Muftiylarimiz 

                                        Eshon Boboxon ibn Abdulmajidxon

      Hijriy 1276 yili (milodiy 1856) Toshkentda diniy ulamo oilasida tavallud topgan. Otasi Abdulmajidxon eshon taniqli olim, mashhur "Mo'yi Muborak" madrasasi mudarrisi, bobosi Yunusxon ibn Ayyubxon mudarris va shayhulislom bo'lishgan. Eshon Boboxon dastlab uyda otasidan, so'ngra Buxorodagi Mir Arab madrasasida mashhur ustozlardan, xususan, Domla Ikromchadan tahsil oldi. Tirishqoqligi, aql-zakovati bois tafsir, hadis, aqoid, fiqh bilimdoni bo'lib yetishdi. Bir necha yillar "Mo'yi Muborak" jome'ida imom-xatib va madrasada mudarris bo'ldi.1943 yili O'rta Osiyo va Qozog'iston musulmonlarining diniy nazorati raisi, muftiy etib saylandi. O'sha yillari musulmonlar vakillarining haj safariga borishlari yo'lga qo'yildi, "Mir Arab" madrasasi qaytadan faoliyat boshladi, masjidlar haqida Nizom ishlab chiqildi, diniy boshqarma kutubxonasiga asos solindi, xalqaro aloqalar kengaydi.1957 yili Toshkentda vafot qildi. Ismoil Qaffol Shoshiy qabrlari yoniga dafn etilgan.

                                     Ziyouddinxon ibn Eshon Boboxon

1908 yili Toshkent shahrida tavallud topdi. Hakim qori domla, Bahodirxon maxdum, Shayx Alouddin, Jamol hoji kabi ustozlardan saboq oldi. O'n ikki yoshida Qur'oni karimni to'la xatm qilib, hofizul-Qur'on bo'ldi. 1920 yili Toshkentdagi "Ko'kaldosh" madrasasiga o'qishga kirib, o'sha paytda Toshkentga kelgan suriyalik olim Ash-Shomiy at-Tarablusiydan hadis, fiqh ilmini o'rgandi.1943 yili O'rta Osiyo va Qozog’iston musulmonlari diniy nazorati mas'ul kotibi va O'zbekiston qozisi bo'ldi. 1947-1948 yillarda Qohiradagi "Al-Azhar" dorilfununida, so'ngra Makka, Madina shaharlarida tahsil oldi. 1948 yili O'rta Osiyo va Qozog'iston musulmonlari diniy nazorati raisining o'rinbosari etib saylandi. 1957 yili O'rta Osiyo va Qozog'iston musulmonlari boshqarmasi raisi etib saylandi va umrining oxiriga (1982 yil) qadar ana shu vazifada samarali ishladi.

 Shamsuddinxon Boboxonov

1937 yili Toshkent shahrida tug'ilgan. 1959 yili Toshkent chet tillar institutining ingliz tili fakultetini bitirgan. 1962-1966 yillarda Qohiradagi "Al-Azhar" dorilfununida tahsil oldi. 1973 yili Maskovda arab filologiyasi bo'yicha nomzodlik ilmiy ishini yoqladi. 1975-1982 yillari Imom al-Buxoriy nomidagi Toshkent Islom oliy ma'hadida rektor, 1982-1989 yillari O'rta Osiyo va Qozog'iston musulmonlari diniy boshqarmasining raisi, muftiy, 1989-1994 yillari O'zbekiston FA Sharqshunoslik institutida katta ilmiy xodim va diniy boshqarma raisining noibi bo'lib ishladi. 1994-2001 yillari diplomatiya sohasida xizmat qildi. O'rdun Qirollik akademiyasining haqiqiy a'zosi, Xalqaro Ibn Sino mukofoti sohibi. 2003 yilda Toshkentda vafot etgan.

                               Muhammad Sodiq Muhammad Yusuf

1952 yidda Andijon viloyatining Buloqboshi qishlog'ida tug'ilgan. Dastlab otasi Muhammad Yusuf hojidan diniy ta'lim olgan. "Mir Arab" madrasasini, Toshkent Islom oliy ma'hadini bitirib, "Sovet Sharqi musulmonlari" jurnali taxririyatida ishladi. 1980 yili Liviyadagi "Islom da'vati" oliy o'quv yurtini muvaffaqiyatli bitirgach, diniy boshqarmaning xalqaro bo'limi xodimi, keyinchalik Islom oliy ma'hadi mudiri noibi, 1983 yildan esa mudir bo'lib xizmat qildi.1989-1993 yillari O'rta Osiyo va Qozog'iston musulmonlari diniy boshqarmasi raisi, muftiy vazifasida ishladi. Bir necha xalqaro Islom tashkilotlarining a'zosi. www.islam.uz

                                         Muxtorjon Abdulloh Buxoriy

1928 yili Qo'qon shahrida tavallud topgan. Buxorodagi «Mir Arab», Toshkentdagi Baroqxon madrasalarida, Suriyadagi Damashq jome'sining shariat kulliyasida tahsil olgan. 1958-1991 yillarda "Mir Arab" madrasasida mudarris, bosh mudarris, mudir vazifalarida ishladi. 1984-1988 yillari Toshkent Islom oliy ma'hadida xorijlik talabalarga dars berdi.1991-1993 yillari Buxoro viloyatidagi "Hazrati Bahouddin Naqshband" masjidida imom-xatib, 1993-1997 yillari Movarounnahr musulmonlari idorasi raisi, muftiy bo'ldi, keyinchalik yana imomlik qildi. 2002 yili vafot etgan.

                             Abdurashid qori Abdulmo'min qori o'g'li Baxromov

1953 yili Andijon shahrida tug'ilgan. Otasi Abdulmo'min qoridan boshlang'ich diniy ta'lim olgan. O'rta makgabni bitirgach, Andijon shahridagi 22-maktabda ishlagan. 1975-1979 yillari Buxorodagi "Mir Arab" madrasasida tahsil oldi. 1979 yili Imom al-Buxoriy nomidagi Toshkent Islom oliy ma'hadiga o'qishga kirdi. 1981 yil oliy ma'hadni bitirib, mazkur ilm maskanida mudarris, so'ngra "Tilla shayx" jome' masjidida imom-xatib bo'lib ishladi. 1997 yildan buyon O'zbekiston musulmonlari idorasining raisi, muftiy vazifasida xizmat qilib kelmoqda.